| A Xunta apoiará a implantación do proxecto de biomasa que Abengoa vai desenvolver en Galicia |
|
|
Santiago, 3 de abril de 2007.- O titular do Goberno galego, Emilio Pérez Touriño, manifestou hoxe o apoio da Xunta ao proxecto de valorización de biomasa forestal mediante gasificación que o grupo Abengoa ten pensado implantar na comunidade galega, da man de XesGalicia. Así llo transmitiu Pérez Touriño ao presidente desta sociedade industrial e de tecnoloxía, Felipe Benjumea, durante a xuntanza que mantiveron esta mañá na residencia oficial de Monte Pío. No encontro, o xefe do Executivo autonómico manifestoulle a máxima colaboración do Goberno que preside para o desenvolvemento e implantación na comunidade desta iniciativa.
Segundo lle expuxo Felipe Benjumea a Pérez Touriño, o proxecto, que se desenvolverá en Curtis e en Sogama, pasa pola produción de bioetanol “de segunda xeración”, a partir de biomasa mediante gasificación e síntese química, que representa a mellor alternativa actual para a valorización da biomasa forestal.
No encontro, o máximo mandatario autonómico manifestoulle ao presidente de Abengoa o interese do Goberno polo proxecto, dado que os biocarburantes de segunda xeración constitúen obxectivos prioritarios para a estratexia de investigación. De aí o compromiso acadado de prestar a máxima colaboración á factoría na procura de axudas, subvencións e incentivos de I+D, a través dos distintos instrumentos financeiros e organismos administrativos da Xunta de Galicia.
Primeira planta no mundo
Deste xeito, o proxecto presentado por Abengoa permitirá que Galicia acolla a primeira planta de produción combinada de enerxía eléctrica e biocarburante no mundo, o que supón unha estratexia pioneira na valorización da biomasa pola súa capacidade e innovación. Emilio Pérez Touriño manifestoulle a Felipe Benjumea o interese da Xunta neste proxecto, por canto poderá achegar beneficios non só na redución da emisión de CO² fósil de 2.000 millóns de t/ano; na valorización de 87.500 toneladas de biomasa forestal ao ano; na prevención de incendios; na creación de emprego e na presenza dunha planta de tecnoloxía que será referente mundial nas tecnoloxías de produción de carburantes, senón tamén porque suporá a oportunidade de que centros de investigación de Galicia participen no desenvolvemento do proxecto piloto e, no caso de éxito da tecnoloxía, as expectativas para valorizar a biomasa respecto a capacidades e valores engadidos serán tamén moito maiores.
 Neste novo proxecto na comunidade galega, Abengoa ten previsto investir entre 85 e 100 millóns de euros. A iniciativa suporá a creación de entre 18 e 35 empregos directos e entre 145 e 280 empregos indirectos e permitiralle a Galicia ser referente mundial nas tecnoloxías de produción de carburantes.Historia de Abengoa
Abengoa é unha sociedade industrial e de tecnoloxía presente en máis de 70 países que conta cun grupo formado por 302 sociedades: a propia sociedade dominante, 273 sociedades dependentes, 26 asociadas e 2 de negocios conxuntos.
Abengoa S.A., a sociedade dominante do grupo, foi constituída en Sevilla en xaneiro de
Participantes na xuntanza
Na reunión mantida esta mañá na residencia oficial de Monte Pío participaron, ademais do titular do Goberno galego, Emilio Pérez Touriño, e do presidente de Abengoa, Felipe Benjumea, o conselleiro de Economía, José Ramón Fernández Antonio; o director de XesGalicia, Álvaro Álvarez Blázquez; José Terceiro, conselleiro de Abengoa; e Antonio Vallespir de Gregorio, director xeral de Abengoa. |
|
| Última actualización ( 28/05/2007 ) |
O titular da Xunta, Emilio Pérez Touriño, expresou o apoio da Xunta á implantación dunha nova iniciativa que o grupo Abengoa prevé desenvolver en Galicia. Foi durante o encontro que mantivo con Felipe Benjumea, responsable do grupo, quen lle presentou este proxecto
