IGAPE

O Igape promove a mellora da produtividade das pemes galegas mediante o apoio á realización de investimentos de carácter tecnolóxico. Tamén apoia proxectos dirixidos a mellorar a organización das pemes mediante a consultoría de proceso e a implantación de ferramentas de xestión. A presentación de solicitudes está aberta desde hoxe ata o día 31 do próximo mes de agosto.

Santiago, 6 de xuño de 2007.- O Igape promove a mellora da produtividade das pemes galegas mediante o apoio á realización de investimentos de carácter tecnolóxico comprendidos entre 100.000 e 600.000 euros e destinados á incorporación de bens de equipo, tamén de carácter tecnolóxico, que se integrarán na cadea de valor ou en departamentos de I+D, deseño ou ensaio.

 

As pemes interesadas nestas subvencións, que poderán cubrir ata o 40%, poderán presentar as súas solicitudes (http://www.tramita.igape.es) a partir de hoxe e ata o próximo 31 de agosto. A convocatoria resolverase polo sistema de concorrencia competitiva.

 

Por outra banda, e de acordo coa convocatoria tamén publicada onte no Diario Oficial de Galicia, o Igape apoiará proxectos dirixidos a mellorar a organización das pemes mediante subvencións á consultoría de procesos e implantación  de ferramentas de xestión e cadros de mando.

 

 

Mediante esta liña á que destina 2,5 millóns de euros, o Igape subvencionará por unha parte os traballos de consultoría de proceso e asistencia técnica específica para a implantación dos proxectos; e, por outro lado, os investimentos en activos como poden ser as ferramentas de software ou  hardware necesarias para as mellora da xestión a implantar nas pemes, e as instalacións de redes informáticas internas ou, se é o caso, custos de aloxamento en remoto.

 

Coma no caso dos proxectos de investimento tecnolóxico, as subvencións poden cubrir ata o 40% dos investimentos ou gastos subvencionables, e as solicitudes poden ser presentadas ata o 31 de agosto.