IGAPE

Santiago, 23 de xullo de 2007.- O conselleiro de Economía e Facenda, José Ramón Fernández Antonio, anunciou hoxe a posta en marcha dos traballos de elaboración dun plan para a mellora da competitividade galega que poderá estar ultimado a finais do presente ano e que permitirá “traballar coas forzas económicas e sociais” dentro do clima de diálogo social e de pacto. Así o explicou ao finalizar unha xuntanza co presidente da Confederación de Empresarios de Galicia (CEG), Antonio Fontenla, no que tamén estivo presente o presidente da Confederación de Empresarios de Ourense, Francisco Rodríguez, e os directores xerais de Orzamentos, Pedro Antonio Fernández, e de Planificación e Fondos Comunitarios, Aureliano García González-Llanos.

 

O conselleiro lembrou que a xuntanza respondía ao compromiso adquirido coa patronal e os sindicatos o pasado ano para manter unha xuntanza antes do verán na que se analizasen os obxectivos e prioridades orzamentarias para o seguinte exercicio. Neste sentido, Fernández Antonio explicou que na reunión se abordou, en primeiro lugar, o grande obxectivo de mellora da competitividade da economía galega “a base de incrementar e mellorar as nosas infraestruturas produtivas”.

 

En segundo lugar, engadiu, figura como obxectivo mellorar o capital humano cunha aposta clara pola educación; mentres que en terceiro lugar situou a aposta pola sociedade do coñecemento. Neste sentido, o conselleiro sinalou a necesidade de mellorar as infraestruturas vinculadas ás telecomunicacións, e impulsar unha maior implantación da sociedade da información en xeral. “Temos que potenciar a sociedade do coñecemento como vía fundamental para incrementar a competitividade da nosa economía no mundo global no que nos movemos”, concluíu.