| Economía e Industria amplía ata decembro o plan re-imaXina para apoiar os investimentos empresariais |
|
|
O programa re-imaXina vén de ser prorrogado para manter o apoio a proxectos de microempresas, emprendedores e pemes que desexan mellorar a súa competitividade. A Consellería que dirixe Javier Guerra busca deste xeito facilitar o acceso ao crédito aos emprendedores para que podan impulsar novos investimentos. Os préstamos contarán co aval dunha SGR que cubrirá o 80% do importe e as entidades financeiras non poderán requirir garantías adicionais.
Santiago, 7 de xullo de 2010.- As empresas de recente creación, ás microempresas e as pemes que precisen financiamento para impulsar investimentos destinados a mellorar ou medrar poderán seguir contando cos préstamos habilitados pola Consellería de Economía e Industria no marco do plan re-imaXina, segundo a prórroga publicada hoxe no Diario Oficial de Galicia, que amplía ata o 30 de decembro o prazo para a presentación de novas solicitudes.
O obxectivo do re-imaXina é habilitar préstamos subsidiados e avalados para apoiar o financiamento dos investimentos impulsados por novas pemes, por pemes que queren medrar ou renovarse para mellorar en competitividade ou por microempresas galegas. O Plan re-imaXina está deseñado para facilitar a concesión polas entidades financeiras de préstamos para investimentos, eliminando dous dos atrancos que adoitan dificultar o acceso ao financiamento das empresas de menos dimensión, as garantías e os custos de xestión.
As microempresas e pemes beneficiarias deste programa de apoio impulsado a través do Igape poderán dispoñer de préstamos que contarán co aval dunha SGR polo 80% do importe do financiamento. Nin as entidades financeiras nin as SGR poderán requirir dos solicitantes máis garantías adicionais que as persoais dos promotores da actividade empresarial. Os beneficiarios tampouco deberán pagar á entidade financeira ou SGR correspondente ningún outro custo derivados da operación acollida a esta liña.
As achegas do Igape fan posible que os xuros dos préstamos concedidos polas entidades financeiras ao amparo deste programa sexan fixos, do 3,14%, no caso dos destinados a microempresas. Os préstamos para novas pemes e pemes competitivas serán variables e estarán referenciados ao euríbor a seis meses; para o segundo semestre deste ano, o xuro efectivo dos préstamos amparados por estas dúas liñas será do 2,48%.
Os préstamos concedidos ao abeiro destas bases e no marco do correspondente convenio que o Igape asinou coas as sociedades de garantía recíproca (SGR) e as entidades financeiras adheridas e que operan en Galicia terán un prazo de amortización de ata 5 anos, no caso da liña para as microempresas, e de 5 a 7 anos nos concedidos nas liñas para novas pemes e pemes competitivas. En todos os casos, os prazo poderán incluir ata 1 ano de carencia na amortización do capital.
|
|
| Last Updated ( Wednesday, 07 July 2010 ) |
