| Economía e Industria axuda aos emprendedores para mellorar o impacto económico da I+D |
|
|
Esta tarde desenvolvese un seminario sobre innovación aberta a partir dunha conferencia impartida desde Estados Unidos. A sesión, organizada por BIC Galicia, está dirixida a investigadores, emprendedores de base científico-tecnolóxica e técnicos de transferencia de tecnoloxía. O próximo 14 de decembro haberá outro seminario sobre a creación dunha start up de base científica e tecnolóxica.
Santiago, 29 de novembro de 2011.- A Consellería de Economía e Industria impulsa iniciativas destinadas a mellorar o impacto económico dos resultados obtidos da I+D+i e pon ao dispor de investigadores e emprendedores galegos encontros on line de cara a mellorar os resultados das iniciativas baseadas nos fundamentos da propiedade Industrial, a comercialización de resultados de I+D ou a xestión de empresas de base científico-tecnolóxica.
Para o encontro formativo en liña que se desenvolverá esta tarde entre as 18 e as 19,30 horas, BIC Galicia escolleu un formato innovador: o chamado webinar, para permitir aos asistentes interactuar entre si con flexibilidade total de localización e compartir unha conferencia en tempo real que será impartida desde Estados Unidos.
Tras o éxito do primeiro webinar desta serie, sobre “Fundamentos de patentes para investigadores e emprendedores no ámbito da enxeñaría”, hoxe desenvolverase a xornada “Innovación Aberta: que é e como se implementa de forma simbiótica?”. Este webinar, dirixido a investigadores, emprendedores de base científico-tecnolóxica e técnicos de transferencia de tecnoloxía, será dirixido por Laura Schoppe, presidenta de Fuentek, compañía americana especializada na xestión e comercialización de tecnoloxía e propiedade industrial.
Esta vez, o obxectivo é mostrar as oportunidades globais de transferencia tecnolóxica que xera a innovación aberta e achegar directrices para saber identificalas e aproveitalas. Para iso, Laura Schoppe analizará o modelo de innovación aberta e as claves para implementala con éxito. A relatora, como presidenta de Fuentek, axudou con éxito a universidades e entes públicos e privados, para xestionar a súa propiedade intelectual e a súa tecnoloxía de forma proactiva, eficiente e eficaz. Ademais, desde 2007 asesora á NASA en materia de estratexia e transferencia de tecnoloxía, dentro do “NASA´s Innovative Partnerships Program”.
Antes de que remate este ano, o próximo 14 de decembro, BIC Galicia prevé organizar outra sesión máis, esta vez sobre creación dunha start-up de base científico tecnolóxica, que será dirixida por Nick Rodgers, socio director de IPSO Ventures. Esta serie de seminarios ten como obxectivo último mellorar o impacto social e económico dos resultados de investigación que se producen en Galicia.
|
|
| Última actualización ( 29/11/2011 ) |
