IGAPE

Santiago, 24 de novembro de 2010.- O director xeral do Instituto Galego de Promoción Económica, Joaquín Varela de Limia, fixo hoxe un balance “moi positivo” do programa de emprendemento impulsado pola Consellería de Economía e Industria da Xunta de Galicia, e que se está a desenvolver a través do Igape e das súas sociedades, Xesgalicia e BIC Galicia.

 

Durante a súa participación na inauguración da xornada de Emprendemento na Integración do Mercado Ibérico, Joaquín Varela destacou que “os emprendedores constitúen o activo máis eficaz para lograr cadrar as contas da recuperación económica”, e lembrou que por ese motivo “desde o comezo da lexislatura, o Goberno galego decidiu que era urxente deseñar un programa económico” axeitado para “outorgar un apoio específico ao emprendemento empresarial”.

 

O director do Igape sinalou que existen diferentes “liñas de axuda orientadas a fomentar o espírito emprendedor, facilitar o acceso a fontes de financiamento, incentivar as estratexias de desenvolvemento da  innovación e potenciar a prospección dos mercados internacionais”. Varela explicou que os labores neste eido están a centrarse “nos proxectos viables que nacen”, para os que se habilitou o fondo de capital risco Xes-Innova, dotado con 1,65 millóns, destinado a facilitar o acceso dos emprendedores ao financiamento: mediante participacións en capital risco, ou a través de préstamos participativos, susceptibles de ser convertidos en participacións no capital.

 

Ademais, a Consellería incrementou a 3 millóns a dotación do programa de axudas re-Emprende, para as Pemes galegas máis novas. Unha liña de apoio que, por primeira vez, inclúe a prefinanciación dos proxectos, mediante a concesión de anticipos de até o 50% da axuda, sen esixencia de garantías. Varela apuntou que “esta fórmula está a convencer aos emprendedores galegos”, xa que durante 2009 e no que vai de 2010, desde o Igape,  concedéronse subvencións a fondo perdido por importe de 1,7 millóns, e impulsouse a mobilización de investimentos cifrados en máis de 6,94 millóns de euros.

Ademais de destacar a utilidade dos apoios financeiros da Consellería de Economía e Industria, o director xeral do Igape fixo fincapé no reforzamento das actividades de BIC Galicia orientadas a “valorizar  a figura do empresario e analizar o proceso que media entre a motivación, a xeración dunha idea e a súa transformación en empresa”.

 

Na súa intervención, Varela destacou a recente posta en marcha do Proxecto Medra, orientado a facilitar aos xestores de novas pemes, de maneira gratuíta, as habilidades e capacidades necesarias para sortear a crise, reforzarse no mercado e crecer de maneira sostida. Esta iniciativa, na que está previsto que participen máis de 750 empresas, diríxese tanto aos proxectos en fase de nacemento, como ás pemes en fase de consolidación, con ata 4 anos de existencia.

 

Coa execución do programa de BIC Galicia estanse a dar a coñecer as ferramentas e axudas que teñen á súa disposición o emprendedores, ademais de pór de manifesto a importancia que se outorga, no mundo empresarial, a cuestións como a elaboración de plans de empresa.