| Economía e Industria difunde os instrumentos de financiamento para proxectos innovadores |
|
|
Economía e Industria difunde os instrumentos existentes para o financiamento de proxectos innovadores e investimentos de base tecnolóxica, mediante un foro específico que se desenvolverá en Santiago o próximo 29 de setembro, contando co directores de Xesgalicia, Javier Aguilera, e de I+D+i, Ricardo Capilla, entre outros destacados relatores. A xornada constituirá tamén o remate do proxecto AT Venture, no que participa o Igape xunto con entidades doutras rexións de España, Portugal, Irlanda e Escocia, e que promove o desenvolvemento de empresas innovadoras.
Santiago, 19 de setembro de 2011.- Facilitar a creación e o desenvolvemento de novas empresas de base tecnolóxica ou cun perfil claramente innovador é o obxectivo que busca a Consellería de Economía e Industria ao promover a organización da xornada “Instrumentos de Financiamento para Startups Innovadoras: Capital Risco e Business Angels”, que se desenvolverá o próximo 29 de setembro en Santiago de Compostela.
O encontro organizado por Igape e BIC Galicia no marco do programa comunitario AT-Venture pretende facer posible que os emprendedores e empresas dispostas a poñer en marcha novos proxectos cun perfil innovador coñezan en profundidade todos os instrumentos de financiamento que existen no mercado, máis alá do financiamento bancario convencional.
A xornada servirá para a divulgación de instrumentos de financiamento como o capital risco e os business angels (investidores privados), cara a impulsores de novos proxectos empresariais especialmente innovadores, así como cara a aqueles profesionais e axentes implicados na creación e desenvolvemento de novas empresas baseadas nas TIC.
O programa, que se desenvolverá ao longo dunha mañá, inclúe relatorios, mesas redondas e tempo para networking. Nunha mesa redonda sobre o financiamento para emprendedores e pemes innovadoras participarán o director xeral de Xesgalicia, a sociedade xestora de fondos de capital risco da Xunta, Javier Aguilera, e o director xeral de I+D+i, Ricardo Capilla, xunto con Pedro Granado, director de relacións institucionais de Enisa, e Miguel Ángel García, do departamento de promoción da innovación do CDTI.
A xornada contará coa participación do director de SeedRocket, Marek Fodor, co-fundador de Atrápalo, que ofrecerá un relatorio centrado nos aspectos a ter en conta para identificar unha boa oportunidade de investimento.
Haberá outra mesa redonda orientada a achegar as habilidades para atraer investidores privados ou business angels a un novo negocio, para formar, a partir de experiencias reais, sobre o proceso de captación de fondos nestes ámbitos. Participarán David Bello, promotor de webPhone, e Diego Cobelo, promotor de Classora.
Para pechar o encontro haberá outra mesa redonda sobre fondos de coinversión público privados e políticas fiscais neste ámbito, contando con relatores como Pedro Regojo, socio de Garrigues, que achegará unha proposta fiscal para España, e Ricardo Luz, de Invicta Angels, que falará sobre os fondos de coinversión en Portugal.
O Foro de Investimento Galicia é un espazo de encontro entre investidores privados, redes de business angels e emprendedores con proxectos empresariais de alto potencial de crecemento desenvolvidos desde ou para Galicia. Promove o desenvolvemento de actividades conducentes a reducir os problemas de financiamento con que se atopan as empresas innovadoras nas súas fases iniciais.
O Foro de Investimento Galicia desenvólvese no marco do programa europeo AT Venture, no que participa IGAPE xunto con outras rexións de España, Portugal, Irlanda e Escocia, e que persegue a promoción e desenvolvemento de empresas innovadoras, así como a súa difusión e mellora do acceso aos instrumentos de financiamento destas start-ups, especialmente sociedades e redes de investimento privado. |
|
| Última actualización ( 29/09/2011 ) |
