IGAPE

Santiago, 26 de de xullo de 2010.- O prazo de presentación de solicitudes ao amparo do programa de garantías re-Brote, destinado a facilitar o financiamento de circulante para as empresas galegas, estará aberto ata o 31 de decembro de 2010, como consecuencia da autorización  de prórroga de prazo de vixencia aprobada polo Consello da Xunta e que se publica hoxe no Diario Oficial de Galicia. Este programa facilita operacións de financiamento de circulante por un importe mínimo de 300.000 euros avaladas polo Igape nunha porcentaxe comprendida entre o 40 e o 60%.

 

Na formulación inicial, o prazo de presentación de solicitudes para o programa re-Brote remataba o 30 de decembro de 2009, pero a Consellería de Economía e Industria xa decidira prorrogalo ata o pasado 30 de xuño para intensificar os apoios ao financiamento de circulante para autónomos, emprendedores, microempresas e empresas, especialmente afectados polas restricións crediticias. O programa re-Brote prorrógase agora ata o próximo 31 de decembro, para manter en vigor os seus obxectivos; este programa de garantías será complementado polo re-Solve+, xa aprobado pola Consellería e Industria a través do Igape para substituír -ampliando e mellorando- o re-Solve; o re-Solve+ será publicado no DOG en datas próximas.

 

O programa re-Brote  está destinado a facilitar o acceso a liñas de financiamento operativo adicional de empresas medianas e grandes. Pola súa parte, a liña denominada re-Solve+, está orientada a facilitar o acceso ao circulante para as microempresas, as pemes e os autónomos.

 

Xunto coas principais entidades financeiras que operan en Galicia, o Instituto Galego de Promoción Económica (Igape), dependente da Consellería de Economía e Industria, veu realizando durante os últimos meses un importante esforzo para subvencionar custos financeiros e compartir riscos mediante os programas re-Brote e re-Solve; dada a situación económica actual, a Consellería de Economía e Industria estima que resulta imprescindible que a administración manteña esta liña de traballo e comparta riscos co tecido empresarial, coas entidades financeiras e as SGR en determinadas operacións, mediante o afianzamento parcial de liñas de financiamento operativo.

 

O programa re-Brote vai destinado a empresas con domicilio social e fiscal en Galicia, que non se atopen en situación de crise, que desenvolvan unha actividade subvencionable e que presenten un proxecto obxecto da financiamento avalado que sexa considerado viable e dentro dos limites de risco asumibles polo Igape. Neste marco, o Instituto poderá garantir operacións de financiamento novas. O importe individual das operacións de crédito acollidas ao Convenio cuxa vixencia se prorroga agora será como mínimo de 300.000 €, con un máximo de risco por empresa beneficiaria entre todas as entidades financeiras colaboradoras de 3.500.000 €. O aval do Igape garantirá entre o 40 e o 60% das operacións, dependendo das características das mesmas.

 

O programa re-Solve+, pola súa banda, incorporará tres liñas diferenciadas, ao sumar á de circulante habilitada no marco do re-Solve –agora superado- as novas liñas para apoiar o financiamento de  operacións de refinanciamento de pasivos ou de ampliacións de capital destinadas a fortalecer a estrutura financeira das pemes, para garantir así a súa competitividade futura. Ademais, o re-Solve+ ampliará ao 100% a cobertura das garantías achegadas polas SGR, sempre cun reaval do Igape polo 25% do risco asumido por estas entidades colaboradoras; no marco do re-Solve, as garantías achegadas cubrían o 90% do risco. Do mesmo xeito, o re-Solve+ incorporará un incremento das contías máximas das operacións apoiadas, que poderán ir de 3.000 ata 500.000 euros (entre 3.000 e 40.000 euros no marco do re-Solve). Outra das melloras incorporadas no re-Solve+ é a referida aos destinatarios; os beneficiarios agora poderán ser os autónomos pero tamén as pemes en xeral, mentres que no re-Solve eran só microempresas e autónomos.

 

Coa prórroga do re-Brote o coa próxima posta en marcha do re-Solve+, a Xunta de Galicia da un paso adiante nos compromisos asumidos a través do Plan re-Forza 2010 do Igape para facer fronte ás restricións de crédito e facer posible que as pemes poidan acceder ao financiamento que precisan para o seu financiamento operativo e para  consolidar as súas estruturas financeiras e mellorar os seus niveis de competitividade.