IGAPE

Representan ou dirixen compañías que suman máis de 160.000 puntos de venda en distintas cidades de China. A misión empresarial reuniuse en Santiago de Compostela con cualificados representantes da industria agroalimentaria galega e visitará as instalacións de Texvigo. Na reunión participou o director xeral de Industria da Consellería de Economía e Industria, Ángel Bernardo Tahoces.

 

Santiago, 4 de maio de 2009.- Unha delegación chinesa coordinada pola Asociación China de Franquías e Cadeas de Tendas (China Chain Store and Franchise Association-CCFA) e integrada por 22 altos directivos de cadeas empresariais, comezou hoxe en Santiago unha visita profesional que ten como obxectivo coñecer a oferta galega de marcas e produtos dos sectores textil e alimentario, con vistas a avaliar a súa introdución no mercado chinés. A misión empresarial inversa está organizada pola división internacional do Instituto Galego de Promoción Económica (Igape) a través do seu centro de promoción de negocios en China.

 

A misión empresarial mantivo hoxe en Santiago un encontro profesional con altos representantes de organizacións empresariais galegas de sectores como ás conservas, os produtos agroalimentarios amparados por denominacións de calidade ou a producción de viños de denominación de orixe. Así, neste primeiro encontro galego-chinés paticiparon directivos e técnicos de Anfaco-Cecopesca, de empresas conserveiras de produtos do mar e da terra, dos consellos reguladores das denominacións de orixe Valdeorras, Ribeira Sacra e Rías Baixas, ou de diferentes adegas. Nésta primeira reunión de traballo participou o director xeral de Industria da Consellería de Economía e Industria, Ángel Bernardo Tahoces.

Mañá martes, día 5, os integrantes da delegación empresarial procedente de China teñen previsto reunirse con representantes de Texvigo, o parque empresarial especializado que integra a 44 empresas téxtiles, en máis de 100.000 metros cadrados de naves onde traballan unhas 1.200 persoas.

 

A Asociación China de Franquías e Cadeas de Tendas é a representante oficial da industria do comercio minorista e de franquía en China, e acolle a empresas de industrias e sectores como alimentación e bebidas, comercio minorista e servizos; actualmente, esta asociación está integrada por 800 membros que reúnen 160.000 puntos de venda, incluíndo minoristas, franquiadores, provedores e organizacións relevantes. Entre os cen membros máis destacados da CCFA sumaron en 2007 unhas vendas por importe de 115.000 millóns de dólares. Entre os integrantes da asociación, e ademais dos minoristas locais, están cadeas multinacionais recoñecidas como Wal-Mart, Carrefour, Tesco ou Burger King.

 

Entre os membros da delegación empresarial desprazada a Galicia están altos directivos de compañías como Liaoning Xinglong Department Store Group Co., Ltd., que conta con 30.000 empregados e está presente en 14 grandes centros comerciais en sete cidades de China; de Qinhuangdao Jiahui business and trade Co.Ltd, o maior supermercado privado da cidade de Qinhuangdao, que ocupa unha superficie de 40.000 metros cadrados e emprega a 1.300 persoas; ou de Baihui Supermarket of Bijie Trade Co. Ltd, con máis de 1.000 empregados, que xestiona tamén cadeas de supermercados e centros de distribución.

 

Entre as principais liñas estratéxicas de actuación do Igape está a destinada a facilitar a internacionalización das empresas galegas e dos seus produtos e servizos, promovendo o incremento das exportacións ou a implantación comercial no estranxeiro. Para avanzar nese reto, o Instituto dispón dun amplo abano de  servizos -tanto en Galicia como en destino-, ferramentas e apoios.