IGAPE

Santiago, 27 de febreiro de 2007.- O grupo Acciona construirá en Arteixo (A Coruña) unha planta de produción de biodiésel na que investirá 80 millóns de euros e creará 35 postos de traballo de carácter indefinido.  O conselleiro de Economía e Facenda, José Ramón Fernández Antonio, mantivo hoxe unha reunión con Joaquín Ancín, director de Acciona Biocombustibles –filial do grupo Acciona- na que analizaron os detalles do proxecto. O consello de dirección do Instituto Galego de Promoción Económica (Igape) –que preside o conselleiro de Economía e Facenda-, aprobou -na reunión celebrada a pasada semana- apoiar con 3,7 millóns de euros o investimento impulsado por Acciona Biocombustibles. A nova planta producirá biodiésel a partir de aceites vexetais e situarase a carón da refinería de Repsol YPF, que será o cliente principal da mesma e podería chegar a formar parte do accionariado da sociedade.

A realización do proxecto de Biodiésel Coruña representa a creación da terceira maior planta de biodiésel da Comunidade Autónoma, cunha capacidade de produción de 200.000 toneladas anuais. Supón, ademais, unha nova posibilidade de potenciar a actividade de produción de biocombustibles, actividade que se pode converter nun sector estratéxico para o desenvolvemento e consolidación do tecido industrial galego. Cómpre lembrar que entre os obxectivos fixados pola Unión Europea para reducir a dependencia enerxética do petróleo e para diminuír as emisións de gases efecto invernadoiro, figura o impulso á fabricación e utilización de biocarburantes.

No sector de biocombustibles Galicia conta actualmente cunha planta de produción de bioetanol no concello de Curtis (A Coruña), propiedade do grupo Abengoa. Sen contar o de Biodiésel Coruña, están en diferentes fases de execución outros cinco proxectos que suman investimentos por importe de 88 millóns de euros e prevén crear un cento de empregos novos. Para apoiar estes investimentos o Instituto dependende da Consellería de Economía e Facenda concedeu axudas que suman 12 millóns de euros. Os proxectos aprobados nos últimos meses son os de Entabán Biocombustibles (Ferrol), Infinita Renovables (Salvaterra, Pontevedra), Tecnoambiente Galicia (Cerceda, A Coruña), Ariasa Bioenergía (Ordes, A Coruña) e Biocarburantes de Galicia (Begonte, Lugo).

Outros proxectos enerxéticos

Ademais dos apoios a proxectos de biocarburantes, o Igape aprobou nos últimos meses outros proxectos de investimentos en materia de enerxías renovables, como o promovido por Biomasa Forestal, en Santa Comba (A Coruña), ou o impulsado por Metalúrgica del Atlántico, que decidiu investir 5 millóns de euros na ampliación das súas instalacións en Ferrolterra para producir torres para aeroxeneradores. En datas máis recentes, o Igape aprobou un importante proxecto de investimento en enerxía solar, como o de T-Solar Global para Ourense, e recibiu un novo proxecto en biomasa, o promovido por Renova en Teixeiro, Curtis.