IGAPE

Fernández Antonio subliña que Ferrolterra é hoxe a área de Galicia con máis solo para novas empresas

O Conselleiro de Economía e Facenda presidiu a reunión coa Asociación Impulsora do Plan Ferrol e garantizou que os orzamentos de Galicia para o próximo ano recollerán dotacións específicas para as medidas incluídas no programa de desenvolvemento; na reunión participou o novo director do Plan Integral de Desenvolvemento das Comarca de Ferrol, Eume e Ortegal, Ángel Sucasas. José Ramón Fernández Antonio tamén se amosou convencido de que  o proxecto de conexión ferroviaria do porto exterior será incorporado aos presupostos do Estado para 2008.   Santiago, 24 de setembro de 2007.- O conselleiro de Economía e Facenda, José Ramón Fernández Antonio, subliñou hoxe que a comarca de Ferrol é a área de Galicia cunha maior dispoñibilidade de solo industrial para novas implantacións empresariais. A recente posta en disposición da última fase do Polígono do Río de Pozo en Narón e a ampliación do de Penapurreira en As Pontes elevan a superficie dispoñible a preto de 800.000 metros cadrados para novos proxectos empresariais. O conselleiro presidiu hoxe a reunión de traballo coa Asociación Impulsora do Plan Ferrol (AIPF) na que se realizou o seguimento do Plan Integral de Desenvolvemento das comarcas de Ferrol, Eume e Ortegal. Na reunión participaron membros da AIPF encabezada polo seu presidente, Ángel García; o director xeral do Igape, Álvaro Álvarez-Blázquez, e o novo responsable da coordinación do plan, Ángel Sucasas. Tamén participaron no encontro o director saínte da oficina xestora do Plan, Casto Varela e o director xeral de Desenvolvemento Industrial do Ministerio de Industria, Turismo e Comercio, Jesús Candil Gonzalo.   Tras a xuntanza, o conselleiro salientou a noticia da implantación no porto exterior de Ferrol dunha planta de biodiésel promovida pola firma Infinita Renovables. Cun investimento previsto de preto de 70 millóns de euros, o proxecto conta xa co apoio do Igape e ten unha previsión de creación de emprego de 35 postos directos e unha producción de 300.000 toneladas anuais. Fernández Antonio explicou, igualmente, que na xuntanza se abordou a iniciativa de instalación dun proxecto hosteleiro no Castelo de A Palma; e a evolución xeral do Plan presentado o pasado mes de marzo. Neste sentido, actualmente están en análise ata trece novos proxectos empresariais entre os que figuran iniciativas dos sectores medioambientais e de novas tecnoloxías. Neste sentido, segundo lembrou, o Ministerio de Industria, Turismo e Comercio ten presupostada unha dotación de 46 millóns de euros que, na súa maioría, están consignados para préstamos a xuro cero e longo prazo.   Na reunión tamén se abordou a importancia do inicio do proxecto de conexión ferroviaria do porto exterior. Neste sentido, Fernández Antonio amosouse convencido de que dito proxecto se incorporará ao presupostos do Estado para o próximo ano. Ademais, o conselleiro garantizou que os orzamentos de Galicia para o próximo ano recollerán dotacións específicas para as medidas incluidas no programa de desenvolvemento.   Ángel Sucasas, novo director do Plan Na reunión participou o novo director do Plan Integral de Desenvolvemento de Ferrolterra, Ángel Sucasas Peón. Licenciado en Ciencias Económicas e Empresariais pola Universidade de Santiago de Compostela, ten experiencia en dirección de proxectos para creación de empresas, dirección de empresas, comercio exterior e consultoría. Sucasas coordinou en 1996 a elaboración do Plan estratéxico para o desenvolvemento de  económico de As Pontes, e foi co-director da Oficina de Promoción e Desenvolvemento Económico de As Pontes (Opyde) durante o primeiro período de implantación deste Plan (1997-98).   Plan integral para a comarca O Plan integral de desenvolvemento das comarcas de Ferrol, Eume e Ortegal mobilizará uns investimentos  de 3.000 millóns de euros para acadar un crecemento económico do 16% ata 2011 e facilitar a creación de 4.000 empregos. O Plan foi presentado polo presidente da Xunta, Emilio Pérez Touriño, e o conselleiro de Economía e Facenda, José Ramón Fernández Antonio, a comezos do pasado mes de marzo en Ferrol e dende entón púxose en marcha a oficina xestora e véñense desenvolvendo reunións periodicamente para facer un seguimento puntual do traballo.   A execución do Plan de desenvolvemento integral das comarcas de Ferrol, Eume e Ortegal estase a impulsar a través dunha ducia de liñas de traballo que teñen como obxectivos a consolidación do sector eólico na zona, o desenvolvemento do sector turístico, a potenciación do sector loxístico e desenvolvemento do porto exterior de Ferrol, o apoio ao desenvolvemento de sectores como a acuicultura, a biomasa ou os biocombustibles, a consolidación do sector naval e da industria auxiliar, as dotacións das infraestruturas e do solo industrial, o fomento do I+D+i ou o impulso á creación de emprego.

Última actualización ( 17/03/2009 )