Actualidade

O director do Igape, Fernando Guldrís, informou dos resultados das exportacións durante o ano pasado, que superaron os 20.000M€ por cuarto exercicio consecutivo. Galicia sitúase como a quinta comunidade en volume de vendas, adiantando na clasificación ao País Vasco e acadando o 8% do total a nivel estatal. Subliña que o número de empresas exportadoras se mantivo o pasado ano por riba das 7000. Mentres que no acumulado de 2020 as exportacións galegas se reduciron o 6%, fronte á caída do 10% no conxunto do Estado, durante o mes de decembro incrementáronse un 6,8%. A balanza comercial galega é a segunda mellor de España, cun saldo positivo de preto de 4274M€, case o dobre que no ano anterior, mentres que a estatal presenta un diferenza negativa de -13.422M€. Destacan os importantes incrementos das vendas a destinos como Francia, Dinamarca, Polonia, Turquía, Xapón e Namibia, con subas que van desde os 15 ata os 43 puntos. Lembra que permanecen abertos os prazos de solicitude das axudas da nova convocatoria do Galicia Exporta Dixital, o Cheque Brexit e o programa de apoio á contratación de expertos en comercio exterior, dotados en total con 9M€.

O director do Igape, Fernando Guldrís, participou hoxe no terceiro encontro dixital Tecnoloxías facilitadoras da Industria 4.0 organizado en colaboración coa Confederación de Empresarios desas comarcas coruñesas. A xornada forma parte das accións do programa Ecosistema 4.0, que achega servizos de formación, diagnósticos individualizados e recomendacións de mellora para potenciar a implantación da nova industria.

O director do Igape, Fernando Guldrís, participou esta tarde nunha xornada en liña do ciclo Brexit Galicia, que ofrece información e analiza accións de mellora para os sectores estratéxicos nas relacións comerciais co Reino Unido. A Administración autonómica realiza unha enquisa dirixida ás compañías para coñecer o impacto que está a producir a saída deste país da Unión Europea. Salienta a aposta do Goberno galego por apoiar ao tecido produtivo co reforzo das liñas de axudas a través da creación da Oficina Brexit.

O Goberno galego reforza con 4M€ a dotación da liña para adaptar os espazos exteriores e adquirir materiais de empaquetado de comidas e bebidas. O programa inclúe anticipos da metade do importe e acadarán o 80% dos investimentos, ata o máximo de 20.000 euros.

O director do Igape, Fernando Guldrís, participou hoxe nun encontro dixital que contou con intervencións de representantes de entidades comerciais norteamericanas e de Abanca USA. As empresas interesadas tamén poderán manter entrevistas individuais virtuais a vindeira semana coa oficina empresarial do Igape situada en Miami. A iniciativa forma parte dun ciclo que afonda tamén nas oportunidades para as exportacións galegas en China, México, Perú, Marrocos, Reino Unido, Israel e India. Subliña que a Administración autonómica demostra o seu compromiso coa internacionalización do tecido empresarial dedicando este ano preto de 23M€ a reforzar as liñas en funcionamento e activar novos programas de axudas.