Actualidade

O director do Igape, Fernando Guldrís, informou da evolución do comercio exterior galego ata novembro de 2020, salientando a mellora na última parte do ano. A balanza comercial da Comunidade é a terceira mellor de España en termos absolutos, cun saldo positivo de preto de 3800M€. Destinos como Francia, Turquía e Noruega experimentaron importantes subas. A Xunta activa apoios por 23M€ para continuar a impulsar a internacionalización do tecido produtivo con programas adaptados ao contexto económico e sanitario e a previsión de colaborar con 1500 pemes galegas. As empresas interesadas poden solicitar ata o 30 de xuño as axudas da nova convocatoria do Galicia Exporta Dixital e ata o 17 de maio as do Cheque Brexit. O DOG publica mañá unha nova edición do programa de apoio á contratación de expertos en comercio exterior, que achegará 2M€ a facilitar a incorporación ao mercado laboral de 75 mozos profesionais e maiores de 45 anos desempregados.

A través do programa Maquinaria 4.0, a Vicepresidencia segunda e Consellería de Economía, Empresa e Innovación incentiva aos fabricantes galegos de bens de equipo a converterse en provedores de tecnoloxía a nivel autonómico, nacional e internacional. As iniciativas mobilizarán 2,4M€ e desenvolverán produtos que ata o momento non se producían na Comunidade, dando resposta a necesidades de empresas tractoras da automoción, as conservas, a agroalimentación e a loxística. Este ano convocarase unha segunda convocatoria que tamén estará dotada cun millón de euros para apoiar as respostas a novos retos detectados a partir de consultas realizadas ao tecido produtivo galego.

Un total de 224 pequenas e medianas empresas recibirán preto de 3,7M€ en axudas que facilitarán a modernización e a mellora da súa competitividade, mobilizando 11,5M€ en investimentos en equipamento e software. Ademais, apóianse con 4M€ sete proxectos Industria 4.0 nos que participan 48 empresas lideradas por cinco clústeres de sectores estratéxicos. Por outra banda, achéganse 358.000 euros ao desenvolvemento de 22 talleres para a xeración de solucións tecnolóxicas e formas de colaboración para a posta en marcha de ferramentas dixitais e nos que se prevé que participen 360 pemes.

O Goberno galego activa nas vindeiras semanas unha nova convocatoria de Galicia Exporta Dixital, unha liña adaptada ás necesidades provocadas pola pandemia da covid-19 para facilitar a reactivación do tecido empresarial e a mellora da competitividade no actual contexto económico. O obxectivo é impulsar as vendas no exterior das empresas galegas a través de ferramentas dixitais innovadoras. En 2020 concedéronse axudas para desenvolver 155 plans de internacionalización dixital en máis de 90 países que permitirán mobilizar 7M€. Complementa as medidas de impulso á dixitalización incluídas no Plan de reactivación e dinamización económica.

O director do Igape, Fernando Guldrís, e o director xeral de Comercio e Consumo, Manuel Heredia, acompañados polo presidente da Federación Galega de Comercio, José María Seijas, destacaron a aposta pola transformación dixital do sector. Estes apoios, a través de programas incluídos no Plan de reactivación económica como os cheques de dixitalización, o Galicia Exporta Dixital ou os proxectos Industria 4.0, mobilizan preto de 13,4 millóns no comercio galego. Permanece aberto o prazo de presentación de solicitudes da nova liña de apoios para o acondicionamento de terrazas e do programa de créditos brandos para os sectores máis afectados pola pandemia.