Actualidade

O director do Igape, Juan Cividanes, participou hoxe en Pontevedra nun encontro con profesionais e empresas, organizado por APE-Galicia, para escoitar as súas demandas e informarlles dos apoios aos que poden acceder. Destacou que o Plan de reactivación económica inclúe axudas para o comercio, o turismo, os servizos e o transporte. A partir de mañá estará aberto o prazo de solicitude da nova convocatoria das  axudas á dixitalización para impulsar a mellora da competitividade e facilitar a dinamización económica.

O director do Igape, Juan Cividanes, e a directora xeral de Comercio e Consumo, Sol Vázquez, participaron nun encontro coas tres principais asociacións de comerciantes de Santiago para informar dos novos programas Reactiva Comercio e Servizos Seguros. Estas liñas contan con 16M€ para o comercio, o turismo, os servizos e o transporte, e apoian medidas novas ou xa realizadas desde a declaración do estado de alarma. As axudas poden destinarse á adquisición de equipos de protección, a adaptación dos espazos, a realización de obras e a posta á disposición de información para os clientes. 

Autónomos, pemes e entidades de economía social poden presentar xa as solicitudes dos programas Reactiva Comercio e Servizos Seguros, cos que se apoia a adquisición de equipos de protección, a adaptación dos espazos, a realización de obras e a posta á disposición de información para os clientes. Búscase ofrecer a máxima confianza aos consumidores e visitantes, ao tempo que se promociona Galicia como un destino fiable e de calidade, no marco do plan Galicia destino seguro. Os apoios dirixidos aos establecementos comerciais, turísticos e salóns de peiteado de menos de 10 traballadores cubrirán o 100% do investimento, ata 1200€. As axudas para as empresas de ata 50 traballadores de calquera dos sectores acadarán o 80% do gasto realizado, cunha achega máxima de 3000 euros. As actuacións poden ser novas ou xa realizadas desde a declaración do estado de alarma.

A Consellería de Economía, Emprego e Industria financiará a creación de espazos de uso aberto e compartido na Cidade das TIC da Coruña, o Polo loxístico liderado por Ceaga na Plisan, o centro biotecnolóxico no parque empresarial da Sionlla e nos municipios de Narón e Vilagarcía. Impulsados polo clúster da automoción e o das tecnoloxías da información e a comunicación, ademais da Área Empresarial do Tambre e o Grupo Intaf, contribuirán a desenvolver a base industrial e fomentar a competitividade. Tres destas infraestruturas integraranse nos Hubs de innovación dixital galegos, que agrupan máis de 4.200 empresas e entidades. O Goberno galego, dentro do Plan de reactivación económica, vén de activar outra liña complementaria destinada á promoción deste tipo de centros industriais impulsados por grandes empresas tractoras.  

Hoxe publícase no Diario Oficial de Galicia (DOG) a convocatoria por 7M€ dos cheques de dixitalización para facilitar o teletraballo e o desenvolvemento de iniciativas empresariais no rural e a economía social. Tamén se convocan os apoios por 3,6M€ para favorecer a internacionalización do tecido produtivo a través do comercio electrónico. Ao abeiro do Plan de reactivación económica impulsado polo Goberno galego, a próxima semana abrirase unha nova convocatoria das axudas á dixitalización das pemes dotada con 5,4M€.