Actualidade

A Consellería de Economía, Emprego e Industria, impulsa a segunda convocatoria do programa, cun incremento do 80% do orzamento, para promover actividades empresariais de autónomos, microempresas e pequenas empresas. Os emprendedores poderán presentar as súas solicitudes ata o día 26 do próximo mes de marzo. Prevese apoiar arredor de 80 novos proxectos de actividades non agrarias e facilitar a creación duns 220 empregos sobre o territorio. Entre as actividades industriais prioritarias nesta liña de axudas ao emprendemento están as de sectores como a automoción, téxtil, aeronáutico, químico, medioambiental, TIC ou audiovisual, entre outros.

O conselleiro de Economía, Emprego e Industria, Francisco Conde, participou hoxe en Santiago nunha xornada de traballo sobre o Mapa de apoios do Igape para 2018, un documento coherente e complementario co resto de iniciativas doutras administracións. Trátase dunha nova guía para que autónomos, emprendedores, Pemes e todo o tecido empresarial coñezan os recursos dispoñibles para facer realidade os seus proxectos, que poidan crecer ou apostar pola súa internacionalización. O titular de Economía destacou que o obxectivo é seguir contribuíndo a que Galicia sexa capaz de seguir medrando sobre as bases da innovación, o coñecemento, a competitividade, a internacionalización e o emprego de calidade. Para apoiar a expansión internacional do tecido produtivo, existen servizos de información e formación e programas como Galicia Exporta e o Plan Foexga, e para apoiar o financiamento das empresas cóntase cos novos Instrumentos Financeiros Innovadores (IFIs).

O Diario Oficial de Galicia recolle hoxe a resolución da terceira convocatoria do programa ReAcciona correspondente a 2017. Esta iniciativa ten como obxectivo prioritario potenciar as competencias e habilidades do capital humano das empresas, para que as melloras introducidas na xestión poidan ter carácter permanente. O servizo máis demandado nesta convocatoria é o destinado a apoiar plans de optimización da produción e cadea loxística. A Consellería de Economía, Emprego e Industria activará en datas próximas novas convocatorias para o programa ReAcciona e o ReAcciona TIC.

O director do Igape, Juan Cividanes, visitou Optare Solutions, unha compañía tecnolóxica, con sede en Vigo, que recibiu o apoio do Igape, a través do Plan Foexga. Cividanes salientou a importancia de que as pemes estean presentes nos mercados exteriores contribuíndo, deste xeito, ao crecemento da economía e á xeración de emprego. A Consellería de Economía, Emprego e Industria proporcionou o pasado ano apoio a preto de 200 empresas en misións comerciais no estranxeiro. O plan Foexga complementa os servizos de apoio e as axudas que se achegan a través do Igape, como o programa Galicia Exporta.

O director do Igape, Juan Cividanes participou hoxe en Santiago na apertura do programa formativo para os novos bolseiros seleccionados, que comezarán a incorporarse en datas próximas a empresas, clústers e entidades colaboradoras. As bolsas do programa ReAcciona, que promove a Consellería de Economía, Emprego e Industria, ofrecen formación especializada, antes e despois do período de prácticas dun ano de duración, participando en proxectos de mellora competitiva. Máis do 62% dos titulados que remataron o seu período como bolseiros nas dúas últimas convocatorias acabaron incorporándose ao mercado laboral de xeito inmediato. Cividanes salienta a importancia da participación de novos titulados nos procesos de mellora competitiva das pemes para avanzar na implantación da Industria 4.0. Esta iniciativa enmárcase no programa ReAcciona da Xunta para facilitar ás pemes galegas a mellora da súa capacidade competitiva e a súa adaptación cara á Industria 4.0.