Actualidade

O Diario Oficial de Galicia vén de publicar a última convocatoria do programa, que financiará investimentos estratéxicos, en transporte de mercancías que utilicen combustibles alternativos e o desenvolvemento de proxectos e infraestruturas de uso compartido por parte de asociacións empresariais. Inclúe a nova liña de axudas destinada a apoiar as empresas auxiliares do sector naval, que ata agora leva aprobados 17 préstamos. Enmárcase dentro do Plan de financiamento empresarial de Galicia, que en 2020 achegará 103 M€ para facilitar o financiamento a 1900 proxectos que mobilizarán 300 M€.

O Plan de financiamento empresarial de Galicia para 2020 dispón de 103 millóns de euros para facilitar o acceso ao crédito e que na Comunidade se asenten novas empresas, de maior tamaño e máis innovadoras. Enmarcado no obxectivo de contar cunha Galicia máis competitiva, o apoio financeiro da Administración autonómica ao tecido empresarial leva permitido, desde 2014, a mobilización de 1371 millóns e o impulso de máis de 12.500 proxectos, máis de 6 ao día. Do total do financiamento achegado neste período, 9,4 de cada dez euros corresponden a iniciativas de autónomos e pequenas e medianas empresas.

O Diario Oficial de Galicia (DOG) publica hoxe as convocatorias de Galicia Exporta Empresas e Galicia Exporta Organismos Intermedios, cuxo prazo de solicitude se manterá aberto ata o 30 de marzo. Estas apoios súmanse ao novidoso programa Galicia Exporta Dixital que permitirá ás pemes avanzar nos seus procesos de internacionalización a través de ferramentas innovadoras. O obxectivo deste paquete de axudas é promover a proxección internacional de 1200 compañías e apoiar a diversificación de mercados. De continuar a tendencia actual, en 2019 o total das vendas galegas ao exterior superará os 21.000 millóns de euros, cifra que se logrou por vez primeira en 2017.

Os directores da Axencia Galega de Innovación (Gain), Igape e Xesgalicia deron a coñecer as iniciativas que participarán na fase de aceleración da segunda edición da aceleradora impulsada pola Xunta e o Clúster Alimentario de Galicia (Clusaga). Os proxectos seleccionados, que achegan solucións innovadoras aos retos identificados pola industria alimentaria galega, accederán a un completo programa para o desenvolvemento e lanzamento do seu produto ou servizo. Hoxe presentouse tamén a primeira convocatoria de consolidación da BFFood, na que poderán participar seis empresas. A BFFood inscríbese na plataforma StartIN Galicia de apoio ao emprendemento, que nos últimos cinco anos leva impulsado máis de 1000 proxectos.

O director do Igape, Juan Cividanes, informou dos resultados do comercio exterior galego dos once primeiros meses de 2019, nos que o superávit superou os 2000 M€, e anunciou a posta en marcha dun programa para reforzar a presenza dixital das pemes nos mercados internacionais. O DOG publica hoxe as bases da nova liña de axudas á internacionalización dixital das empresas galegas, que forma parte do programa Galicia Exporta, que nas súas tres liñas suma en total 11,2 millóns de euros. En novembro do pasado ano Galicia vendeu no exterior un 6,6% máis que no mesmo mes de 2018 e o número de compañías exportadoras situouse nas 6808.