IGAPE

Toquio, 11 de abril de 2009.- Economía e Industria promoveu, a través do Centro de Promoción de Negocios (CPN) que o Instituto Galego de Promoción Económica (Igape) ten en Xapón, a penetración dos viños e dos queixos galegos durante a segunda edición da feira internacional Wine and Gourmet que se desenvolveu en Toquio durante a semana que agora remata, e onde se deron cita expertos e especialistas do ámbito agroalimentario.

 

Cinco adegas galegas participaron nesta mostra para promocionar os seus produtos, nun espazo facilitado polo Igape, que prestou ademais apoio en destino ás empresas galegas participantes para a busca de contactos e preparación de axendas. A adega Vitinivinícola do Ribeiro presentou os seus caldos Viña Costeira e Pazo, ademais de promover augardentes e  licores de café e herbas baixo a marca Lúa. Da Denominación  Protexida Terras de Barbanza e Iria participou na feira a adega Entre os Ríos, co seu albariño Altares. Tamén albariños e baixo a bandeira de Galicia Calidade estivo Bodegas Vilarvín, cos seus viños Valtea e Finca Garabato; e, do mesmo xeito, estiveron presentes nesta mostra xaponesa os caldos Terra do Gargalo, da D.O Monterrei; e Bodegas Ruchel,  da D.O  Valdeorras, levou a Xapón dous viños, un  godello e un mencía.

 

O Igape participou nesta Feira cun espazo propio onde, ademais de desenvolver accións de promoción de Galicia e dos seus produtos máis tradicionais, facilitou apoio e asistencia directa ás empresas galegas participantes na procura de contactos e elaboración de axendas orientadas a ampliar a penetración dos viños galegos no selectivo mercado xaponés. Coincidindo coa nutrida representación dos viños galegos neste evento, unha empresa xaponesa importadora de queixos galegos fixo promoción e degustación dos produtos amparados polas denominacións protexidas de Tetilla, Árzua-Ulloa e San Simón.

 

Tamén estiveron presentes en Xapón representantes do Consello Regulador da  D.O de Rías Baixas para promover os viños desta denominación de orixe. Rías Baixas protagonizou un acto de promoción que consistiu nunha cea degustación de viños galegos maridados con receitas orixinais da cociña xaponesa moderna de fusión. Da organización deste evento, que reuniu a xornalistas especializados e importadores e distribuidores de viños, ocupouse tamén o Igape a través do seu CPN en Xapón.

Wine and Gourmet  é a primeira feira  de Xapón dedicada exclusivamente a viños y bebidas alcohólicas, produtos gourmet , confitería, catering e servizos de equipamento e subministro de comidas. A mostra desenvolveuse entre os días 7 e 9 de Abril no Centro de Exposición Internacional “Bigh Sight” de Tokyo, onde se deron cita centos de especialistas en produtos agroalimentarios.