IGAPE

Santiago 23 de outubro de 2011.- Máis de 2.000 persoas participarán o próximo martes, día 25, no Día Emprendedor de Galicia en Santiago de Compostela, a gran cita anual do emprendedurismo galego que promove a Consellería de Economía e Industria -en colaboración co Mityc- e onde os asistentes poderán coñecer as claves para detectar as actuais oportunidades de negocio e conseguir financiamento, así como as formas de afondar nas vantaxes empresariais das novas tecnoloxías e as posibilidades da internacionalización.

 

O encontro, que está organizado polo Igape e BIC Galicia en colaboración con outras entidades que traballan para favorecer a creación de novas empresas,  contempla tamén un espazo de asesoramento individualizado e gratuíto no que expertos de diversas entidades de xestión empresarial resolverán as dúbidas de emprendedores e empresarios.

 

Dentro da liña temática “Emprendendo” desenvolveranse diferentes mesas redondas que achegarán experiencias e consellos de prestixiosos expertos do ámbito da creación de empresas. Así, por exemplo, na mesa “Emprender en feminino”, na que participarán Irene Bonet, da Federación de Empresarias de Galicia, e Eva López, de Woman Emprende, explicaranse as diferentes liñas de apoio que existen para aquelas mulleres que desexan por en marcha o seu propio negocio. Sobre axudas ao emprendemento tamén faltarán Maite Cancelo, Directora de Bic Galicia, Guillermo Nieto e Daniel Ramos, de AJE Galicia e David Baltar, fundador de Argonáutica.

En paralelo, na liña temática “Oportunidades de Negocio”, abordaranse diferentes vías para lanzarse a aventura empresarial como a Universidade ou os Viveiros de Empresa. As posibilidades do mercado exterior serán tamén analizadas na mesa redonda “A internacionalización como vía de Emprendemento”, na que intervirá, entre outros relatores, Patricia Forján, de Cadelin.com, unha empresa especializada en roupa e accesorios para mascotas cunha destacada proxección internacional.

 

O financiamento e os criterios de valoración do risco das iniciativas financeiras serán abordados nun itinerario específico no que expertos na materia explicarán as diferentes opcións que existen no mercado para a capitalización dunha empresa. Dende as sociedades de xestión financeira ata os business angels ou a banca ética. O mercado ofrece diferentes produtos e alternativas que deben ser tidas en conta e analizadas por aqueles que necesiten captar financiamento para o seu negocio.

 

Moitos emprendedores galegos ven nos negocios de base tecnolóxica unha vía na que abrirse camiño no mundo empresarial.  Por este motivo, O Día Emprendedor Galicia achega a expertos nesta área como Fernando Gómez, creador do Grupo Más Impacto, Carlos Blanco, Fundador do Grupo Itnet, ou  Javier Varela, consultor de marqueting e socio de Toctoc Media, que achegarán as súas experiencias como emprendedores e como expertos no mundo da tecnoloxía e internet.

 

Ademais, haberá itinerarios específicos destinados aos Axentes de Desenvolvemento Local (ADLs) e para os profesionais da educación que traballan para o fomento da actividade emprendedora entre os máis novos.

O Día Emprendedor, que xa se desenvolveu este ano en Lugo e en Ourense –os días 18 e 20-, quere contribuír ao desenvolvemento no país dunha cultura emprendedora para que ideas e proxectos baseados en avances científicos, tecnolóxicos e de innovación, poidan converterse en realidades empresariais.

 

A  xornada poderá ser seguida a través das redes sociais. As novidades do encontro estanse a comunicar no seu espazo en Facebook en Linkedin e en Twitter. Ademais, a xornada será retransmitida a través de Twitter (@emprendedor_gal) para todos aqueles emprendedores que non podan achegarse a Santiago de Compostela.