IGAPE

O Instituto dependente da Consellería de Economía e Industria procura deste xeito avanzar na proximidade e na difusión das súas posibilidades de axuda a empresarios, emprendedores e profesionais. A presenza en “Vinis terrae” será o 8 e o 9 de xuño, e na Semana Verde de Galicia, do 11 ao 14 deste mesmo mes.

 

Santiago, 5 de xuño de 2009.-Co obxectivo de poder achegar información  detallada sobre os seus servizos e as súas diferentes liñas de apoio para favorecer á actividade emprendedora e empresarial, o Instituto Galego de Promoción Económica (Igape) estará presente, con espazo expositivo propio, en Vinis Terrae, o II Salón de Viño e Licores Galegos de Calidade, que se desenvolve os próximos días 8 e 9 de xuño, no Recinto Feiral de Expourense. Tamén durante a próxima semana, do 11 ao 14 deste mes de xuño, o Instituto estará presente na Semana Verde de Galicia, en Silleda.

 

Como salón exclusivamente profesional, Vinis Terrae dispón de 5.000 metros cadrados para exposición de produtos, ofrecendo ademais unha estrutura de deseño singular con amplo equipamento para as adegas. Entre os expositores haberá adegas, cooperativas e embotelladoras de augardentes e licores tradicionais galegos. Entre os seus visitantes haberá compradores nacionais, procedentes tanto do sector da distribución como da hostalería, e importadores e distribuidores duns 15 países.

 

No espazo expositivo do Instituto dependente da Consellería de Economía e Industria, os empresarios e profesionais asistentes a Vinis Terrae terán oportunidade de coñecer en detalle as distintas liñas de axuda e os servicios que ofrece o instituto para apoiar novos investimentos, para respaldar o financiamento de novas iniciativas empresariais ou para impulsar as accións de internacionalización das empresas.

 

Por outra banda, tamén durante a próxima semana, do 11 ao 14 de xuño, o Igape estará igualmente presente cun espazo propio na Semana Verde de Galicia, co obxectivo de achegarse aos empresarios, emprendedores e profesionais do sector agroalimentario e facilitarlles información directa sobre as diferentes liñas de apoio existentes para investir, mellorar a competitividade das empresas ou avanzar na proxección exterior cara a novos mercados.