IGAPE

No ámbito do programa re-Emprende, a Consellería de Economía e Industria incrementou un 25% os recursos para novos proxectos emprendedores e concederá, sen requirir aval, anticipos do 50% das subvencións aprobadas. Ademais, a través do programa re-imaXina, o Igape achega tamén préstamos subsidiados e avalados para impulsar os proxectos dos emprendedores e novas sociedades. A través das oficinas territoriais do Instituto, e co apoio das novas tecnoloxías, é posible poñer en marcha unha empresa en menos de 48 horas.

 

Santiago, 16 de maio de 2010.- No marco do Plan re-Forza 2010 que desenvolve o Igape, e a través do programa re-Emprende, a Consellería de Economía e Industria incrementa este ano nun 25% os fondos para o programa específico de apoio aos novos emprendedores, que ten como obxectivo prioritario apoiar a creación de novas empresas, que en Galicia medrou un 23,4% no pasado mes de marzo, segundo os últimos datos estatísticos do INE. Con respecto ao mes de marzo do pasado ano, o incremento de creación de empresas en Galicia foi do 2,55%.

 

Mediante o novo programa re-Emprende, o Instituto Galego de Promoción Económica (Igape), reforza a súa aposta clara e decidida para procurar que ningunha iniciativa viable quede sen poñer en marcha por falta de financiamento adecuado. Así o manifestou en datas recentes o Conselleiro de Economía e Industria e presidente do Instituto, Javier Guerra, durante a presentación das novas bases reguladoras das axudas do Igape aos proxectos de creación de pequenas e medianas empresas, ou de realización de investimentos en novas pemes promovidos por novos emprendedores. 

Mediante estas novas bases, a Consellería de Economía e Industria pre financiará, a través do Igape, e mediante a concesión de anticipos sen aval do 50% da anualidade da subvención concedida, os proxectos de novos emprendedores que impulsen investimentos de ata 1.500.000 euros. Coa concesión de anticipos e pagos a conta sen requirir garantías aos beneficiarios, o Goberno galego busca facer fronte ás dificultades que atopan habitualmente os novos emprendedores para acadar financiamento nas entidades de crédito.

 

O conselleiro de Economía e Industria lembrou que, para impulsar as súas iniciativas empresariais, os novos emprendedores galegos poden atopar no Igape outros instrumentos de financiamento como os préstamos subsidiados e avalados regulados no programa re-imaXina, aberto á presentación de solicitudes ata o próximo 30 de xuño, ou as participacións vía capital risco a través dos fondos Emprende ou Semente, que xestiona Xesgalicia, a sociedade xestora dos fondos da Xunta de Galicia.

 

Javier Guerra tamén destacou o intenso labor que desenvolve o seu departamento a través de BIC Galicia para facilitar formación e asesoramento a emprendedores, por unha banda, e accións de consolidación de novas empresas, por outra. Segundo explicou, durante 2009 foron case 8.400 as persoas que participaron nas 400 accións formativas dirixidas a estudantes, emprendedores, empresarios e axentes de emprego.

 

O conselleiro de Economía e Industria salientou igualmente que, a través do Igape, os emprendedores galegos poden crear as súas empresas de forma áxil, en menos de 48 horas, facendo uso dos puntos de asesoramento e inicio de tramitación  (PAIT) que o Instituto ten en cada unha das súas oficinas territoriais en A Coruña, Ferrol, Lugo, Santiago, Ourense, Pontevedra e Vigo.