IGAPE

O plan re-Móvete conseguiu triplicar durante a primeira quincena de decembro o número de solicitudes autorizadas no mesmo período de novembro. A Consellería de Economía e Industria prepara a inminente activación do sistema de cupos para repartir o crédito existente de xeito que os concesionarios teñan garantía de que as operacións tramitadas contarán coa axuda prevista.

 

Santiago, 16 de decembro de 2010.- A mellora das condicións do plan re-Móvete comercial anunciada polo conselleiro de Economía e Industria, Javier Guerra, o pasado 1 de decembro, conseguiu que durante a primeira quincena deste mes se autorizasen máis de 1.500 solicitudes, triplicando así a cifra das rexistradas durante a mesma quincena do mes pasado.

 

Este éxito do plan motivou que estean próximos a esgotarse os créditos habilitados, polo que se fixo necesario preparar a activación do sistema de cupos, que estará en vigor de xeito inmediato e que garantirá aos concesionarios a seguridade de que as operacións tramitadas disporán de apoio.

 

Co impulso acadado na demanda de solicitudes, o Instituto Galego de Promoción Económica ten rexistradas telematicamente, nesta segunda etapa do re-Móvete comercial, preto de 7.000 solicitudes que permitirán xerar unha facturación ao sector que superará os 105 millóns de euros.

 

A través do novo plan re-Móvete 2010 G, coas novas condicións de apoio da Xunta e o compromiso do sector, triplicáronse as axudas previstas en principio para dinamizar as vendas de turismos. Las axudas son de 2.010 euros para turismos de prezo comprendido entre os 10.000 e os 30.000 euros, e de 1.600 para os coches de menos de 10.000 euros, repotenciando as xa contempladas no re-Móvete Comercial 2010. Asemade, estas axudas estenderanse tamén até chegar aos 2.010 euros para os vehículos industriais, despois do acordo alcanzado co sector.

 

Todas as axudas do plan re-Móvete son  tramitadas de forma telemática. Para ofrecer ás entidades colaboradoras e aos cidadáns a seguridade xurídica de que todas as solicitudes rexistradas contarán co incentivo previsto, faise necesario activar o sistema de cupos, que permite repartir os créditos existentes de forma proporcional ao importe das operacións tramitadas por cada concesionario ata ese momento.