IGAPE - Plan económico - financeiro: viable

Plan económico - financeiro: viable

Índice de artigos
Plan económico - financeiro: viable
Emprego da ferramenta VIABLE

Páxina 1 de 2

O Plan económico-financeiro: viable

O plan económico-financeiro é a parte numérica do plan de empresa. Neste apartado teranse en conta documentos como o plan de investimentos, as fontes de financiamento, plan de vendas...

A determinación das viabilidades técnica, económica e financeira do proxecto atópase entre os obxectivos fundamentais do PLAN DE EMPRESA.

Naturalmente, a determinación da viabilidade técnica do proxecto consiste en demostrar que se pode face-lo que se quere facer e que, ademais, funciona. Pero iso non implica que o emprendedor non deba garantila, ó contrario, deberá dedicar un esforzo específico a demostrar que o novo deseño, o novo producto ou servicio, o novo procedemento de fabricación ou de comercialización,etc. é susceptible de ser realizado como se pretende e cos custos que se estiman.

Para a estimación da viabilidade económica debemos ter en conta:

O plan de investimento inicial e as estimacións de necesidades futuras. Deberá incluí-las estimacións sobre a vida útil dos ditos investimentos, é dicir, as decisións sobre as amortizacións técnicas ou económicas.
As fontes financeiras dispoñibles inicialmente, así como as que se poidan utilizar máis adiante. Isto inclúe os custos financeiros da débeda e os prazos de amortización desta (amortización financeira).
O plan de vendas de cada un dos anos que se quere proxectar, co nivel de detalle que sexa pertinente.
As previsións de custos ó longo do mesmo período. Adicionalmente, deberanse clasificar convenientemente os ditos custos separando os chamados custos variables ou proporcionais dos custos fixos, para facilita-la análise dalgúns aspectos específicos como o punto de equilibrio.
As contas de perdas e ganancias (ou de resultados) que se prevén para o mesmo período.
O cálculo do punto de equilibrio da empresa, nivel a partir do cal esta comeza a obter beneficios.

Consideraremos que un proxecto é viable economicamente cando, unha vez acadada a súa capacidade de producción plena, é capaz de obter da súa actividade, deducidos tódolos seus custos, un excedente (beneficio) suficiente para facer fronte ó custo da súa débeda, á remuneración dos seus accionistas e ó financiamento dunha parte do seu crecemento.

Para estudia-la viabilidade financeira analizaremos:

Os balances de situación previsionais, estados financeiros que recollen información sobre a situación patrimonial da empresa (os bens, dereitos e obrigacións que ten) durante o período das previsións.
Os estados de tesourería previsionais.

Adicionalmente tamén podemos analizar:

Algunhas ratios que resuman e interpreten toda a información anterior: rendibilidade, marxe, rotación, endebedamento, etc.

Enténdese que un proxecto de empresa é viable, financeiramente falando, cando os recursos xerados pola actividade –beneficios retidos, amortizacións e provisións, etc.– máis determinados fondos procedentes do exterior da empresa –principalmente as contribucións iniciais ou posteriores dos propietarios e o endebedamento a longo prazo– son suficientes para facer fronte ás necesidades financeiras que presenta a empresa.

As ditas necesidades son, basicamente, os investimentos iniciais e posteriores, as necesidades iniciais e posteriores do FONDO DE ROTACIÓN, a cancelación de débedas e as eventuais perdas que se puidesen producir.

Esta suficiencia –ou insuficiencia– de recursos financeiros virá recollida polos saldos das CONTAS DE TESOURERÍA dos BALANCES DE SITUACIÓN PREVISIONAIS de cada un dos anos que se presuposten.

Anterior - Seguinte >>

Última actualización ( 17/09/2010 )