IGAPE

As iniciativas de creatividade amparadas neste marco deberán incidir dentro do Plan de desenvolvemento integral  das comarcas de Ferrol, Eume e Ortegal, sen que iso exclúa que, no momento da súa aplicación práctica, poidan beneficiar tamén a outros territorios. O prazo para a presentación de iniciativas rematará o próximo día 11 de maio.

 

Santiago, 30 de abril de 2009.- Impulsar a mellora da competitividade empresarial nas comarcas de Ferrol, Eume e Ortegal mediante a promoción da creatividade aplicada á innovación dos procesos e produtos é o obxectivo principal dos premios ás iniciativas para o fomento da creatividade aplicada que o Instituto Galego de Promoción Económica (Igape) vén de convocar na súa II edición. O prazo para a presentación de iniciativas rematará o próximo 11 de maio..

 

Neste ano 2009, declarado pola Unión Europea como Ano Europeo da Creatividade e a Innovación, os premios ás iniciativas de creatividade aplicada constitúen unha actuación singular impulsada ao amparo do convenio asinado polo Igape –no marco do Plan Integral de Desenvolvemento de Ferrol, Eume e Ortegal-, as tres universidades galegas e a Asociación Impulsora do Plan Ferrol (AIPF); un convenio que procura, mediante un esforzo coordinado e conxunto, elevar o nivel socioeconómico, cultural, formativo e tecnolóxico das comarcas de Ferrolterra mediante a dinamización da creatividade persoal e a relación científica e tecnolóxica entre as institucións educativas, os centros tecnolóxicos e as empresas produtivas.

 

Segundo a convocatoria publicada o pasado 17 de marzo no Diario Oficial de Galicia, o Igape premiará iniciativas ou propostas creativas que poidan conducir a un novo produto ou servizo, á mellora dos existentes, á implantación de novos proxectos e ao aumento da capacidade competitiva das empresas, do capital humano e do territorio. As actuacións amparadas neste marco deberán incidir directamente dentro do Plan de desenvolvemento integral  das comarcas de Ferrol, Eume e Ortegal, sen que iso exclúa que poidan beneficiar tamén a outros territorios ou ao conxunto da sociedade.

 

As actividades prioritarias para estas iniciativas de creatividade aplicada están entre as contempladas no Plan Integral de Desenvolvemento das Comarcas de Ferrol, Eume e Ortegal que coordina o Igape: enerxías alternativas, loxística, industria naval, turismo e medio ambiente e natureza. Non obstante, tamén poderán acollerse a esta convocatoria calquera outra actividade ligada ao coñecemento, que non exista na zona pero que poida implantarse nun prazo medio, e calquera outra iniciativa que sirva aos obxectivos do convenio de colaboración.

 

Poderán optar aos premios a iniciativas de creatividade aplicada persoas físicas e xurídicas, departamentos  universitarios e centros tecnolóxicos de calquera ámbito territorial, segundo os requisitos detallados nas bases reguladoras.

 

Entre as iniciativas premiadas na I convocatoria dos premios a iniciativas de creatividade aplicada estivo o mecanismo Función Multi-Par, ideado por Victoriano García para mellorar o rendemento de todos os motores de combustión, ao aumentar a potencia a igual cilindrada e reducir o consumo e as emisións de CO2. O centro Tecnológico da Automoción de Galicia (CTAG) interesouse pola iniciativa e proponse desenvolver un prototipo baseado no mecanismo para probar a súa eficacia  nos motores de vehículos convencionais.