IGAPE

Santiago de Compostela, 13 de xuño de 2010.- Os resultados do Plan re-Forza impulsado pola Consellería de Economía e Industria a través do Instituto Galego de Promoción Económica (Igape) co fin, entre outros, de mellorar e axilizar a xestión das axudas, poñen de relevo que se cumpre o obxectivo previsto antes do esperado, segundo afirmou hoxe o conselleiro Javier Guerra.

 

“Nos cinco primeiros meses deste ano”, apuntou, “rebaixouse a 46,2 días o prazo de pagamento das solicitudes de cobro de axudas, axilizando así a xestión en case un 54%, desde os 100 días requiridos durante os primeiros cinco meses de 2010”. Está así practicamente cumprido un dos obxectivos principais do Plan re-Forza, que apostaba por reducir a 45 días, en decembro deste ano, o prazo de pagamento das solicitudes de cobro de axudas, e que permitiu que as solicitudes de cobro xa pagadas a 31 de maio incrementáranse nun 500% con respecto ó 2009, pasando das 1.095 ás 5.490.

 

Por outra banda, o conselleiro de Economía e Industria salientou que “os indicadores de xestión de axudas do Igape revelan un notable incremento na confianza dos investidores, que se pon de manifesto nas cifras de recepción de proxectos de grandes investimentos e, sobre todo, no importe dos investimentos proxectados”. Deste xeito, as solicitudes de axudas para grandes investimentos incrementáronse nun 760% nos 5 primeiros meses do ano; dos 5 proxectos recibidos nos primeiros cinco meses do ano pasado pasouse a 38 proxectos recibidos en 2010.

 

O incremento aínda foi maior se a variable a considerar é o volume dos investimentos que suman os proxectos de grandes investimentos recibidos. Dos 21,4 millóns de euros que sumaban os cinco proxectos recibidos entre xaneiro e maio do pasado ano pasouse a 293,9 millóns de euros no que vai de ano, “o que supón que o incremento no volume de investimentos recibidos é dun 1.373%”, informou Javier Guerra, quen compareceu ante os medios acompañado polo director do Igape, Joaquín Varela.

 

O conselleiro de Economía e Industria explicou tamén que durante os 5 primeiros meses do ano o novo modelo de xestión do Igape fixo que as solicitudes de axuda resoltas se incrementaran nun 63% con respecto ao mesmo período do ano 2009, pasando de 2.711 solicitudes resoltas ata ás 4.431. “Do mesmo xeito”, afirmou, “cada día son máis os solicitantes e menor o tempo de espera para resolver, xa que o tempo de estudo das solicitudes de axuda rebaixouse nun 17% no mesmo período avaliado”. Se nos cinco primeiros meses de 2009 o tempo medio de resposta para unha solicitude era de 130 días, neste ano 2010 conseguiuse que non superara os 108 días.

O Plan re-Forza supón a aplicación dun novo modelo de xestión interna no Instituto dependente da Consellería de Economía e Industria, coa incorporación de novas medidas orientadas á axilización da xestión e dos procesos necesarios para o estudo, avaliación, resolución das axudas e correspondente pagamento ás empresas galegas.

 

Este novo modelo ten como eixos fundamentais fomentar e impulsar a competitividade e a internacionalización do  tecido empresarial galego, que “ten que competir con ambición polos mercados nacionais e internacionais coa Consellería de Economía e Industria e o Igape como facilitadores da súa iniciativa”. A aposta decidida da Xunta de Galicia pola internacionalización da peme galega ten un claro reflexo nos presupostos do Igape para o ano 2010 (o orzamento sube un 56%). O Igape proponse dar en 2010 un impulso que sitúe a Galicia e as empresas galegas nos mercados actualmente máis dinámicos e con maior potencial de adquirir os seus produtos e servizos.

 

O Plan re-Forza do Igape para 2010 considera igualmente prioritario incrementar o pulso orzamentario no que se refire á competitividade empresarial a través  da mellora do capital organizativo das pemes. Así, a capacidade orzamentaria para axudas do IGAPE incrementouse neste ano en 39,9 millóns de euros, pasando dos 306 millóns do 2009 aos 345,9 millóns no 2010.