IGAPE

O plan elaborado a través do Igape marca 11 sectores prioritarios de actuación para superar o estancamento na creación de emprego, actividade e riqueza na comarca. O proxecto mobilizará un investimento global de 3.000 millóns de euros, dos que 1.163 procederán de recursos públicos. Prevé un crecemento económico acumulado do 16% ata 2011, cifra que cuadriplica a media dos últimos 25 anos

Ferrol, 12 de marzo 2007.- O presidente da Xunta, Emilio Pérez Touriño, presentou esta mañá o Plan de Desenvolvemento Integral das Comarcas de Ferrol, Eume e Ortegal 2007-2011 que prevé un investimento público de 1.163 millóns de euros, cos que o Goberno galego pretende impulsar un cambio das tendencias regresivas que afectaron á zona nos últimos 25 anos e incorporala á creación de emprego e á actual fase expansiva e de dinamismo económico.

O plan foi presentado esta mañá ante os axentes sociais e económicos da comarca de Ferrolterra, nun acto ao que asistiron 200 persoas e que contou coa participación do conselleiro de Economía, José Ramón Fernández Antonio.

Mudar a historia

“Estamos en condicións de mudar a historia e iniciar unha dinámica positiva na creación de actividade e de emprego a través das propostas recollidas no plan”, destacou Pérez Touriño, quen sostivo que o obxectivo presentado no proxecto para Ferrolterra é crecer un 16% ata o ano 2011, o que suporía acadar unha taxa anual do 3% e multiplicar por catro o ritmo medio dos últimos 25 anos. Lograr este obxectivo implicará a creación de 4.400 empregos e a xeración dun valor engadido estimado en 3.000 millóns de euros.

Investimentos nas redes de comunicación

O máximo mandatario autonómico sinalou que o investimento público está dirixido en boa medida a completar os grandes equipamentos en infraestruturas, fundamentais para que o proxecto poida “ser exitoso”. Entre eles citou a accesibilidade e posta en servizo do porto exterior de Ferrol, o saneamento integral da ría e a conclusión de dous grandes eixes de comunicación: a autovía Ferrol-Vilalba e a vía de alta capacidade Ferrol-San Cibrao.

Respecto da autovía, Pérez Touriño sinalou que se están a investir 135 millóns de euros, mentres que na conexión a San Cibrao o investimento é de 277 millóns de euros. Con estas dúas infraestruturas viarias “quedará completada a rede de comunicacións de Ferrol coa Autovía do Cantábrico, a A-6 e a vía de alta capacidade comunicará toda a costa, o que debe permeabilizar e permitir o crecemento de todo o Cantábrico galego”. Xunto a estas infraestruturas tamén citou os investimentos en solo industrial, que recibirán 172 millóns de euros.

A este respecto, o titular do Goberno galego anunciou “o compromiso xa pechado” co presidente da SEPI para liberar un mínimo de 200.000 metros cadrados de terreos ociosos en Fene de xeito que se poidan reutilizar seguindo as liñas e orientacións marcadas polo plan. Xunto a isto, incidiu, está en marcha a xestión do polígono de San Pedro de Leixa, así como o estudo de viabilidade da plataforma de Mandiá e case completada a 4ª fase do polígono de Río do Pozo, o que suma un total de 3.600.000 metros cadrados de solo empresarial, sen contar os terreos de Fene e os 500.000 metros cadrados do porto exterior, explicou Pérez Touriño.

Xestión coordinada

“O máis importante é que poñemos en marcha un instrumento que permite por vez primeira a xestión coordinada e integral de todos os sectores para conseguir o éxito de superar a situación”, subliñou o xefe da Administración autonómica.

Pérez Touriño tamén avanzou o compromiso do Goberno galego de que todas as dársenas e peiraos da comunidade teñan conexión ferroviaria e, neste sentido, salientou a recente publicación do estudo informativo da conexión do porto exterior ferrolán. Ademais, avanzou que este porto estará plenamente operativo no vindeiro ano e comprometeu o lanzamento da segunda fase desta dársena unha vez estea cuberta e funcionando a primeira, “sen solución de continuidade”. “Temos que volcarnos na operatividade, posta en valor inmediata e a atracción de tráficos no porto exterior, que é a grande oportunidade de Ferrol”, expresou o presidente, quen lembrou que a entrada en funcionamento desta dársena coincidirá coa da regasificadora de Mugardos.

Finalmente, o máximo mandatario da Xunta salientou o compromiso inequívoco do Goberno galego e do de España con Ferrol e considerou que Galicia atravesa un escenario “razoablemente positivo e de esperanza” para abordar o proxecto hoxe presentado con garantías de éxito e de cumprimento dos obxectivos marcados.

“Da unión concreta da Oficina de impulso e xestión do plan, coa participación directa da Asociación Impulsora do Plan Ferrol e todos os axentes políticos temos un instrumento prezado, magnífico, útil para trazar cada paso, definir o horizonte e avaliar o grao de éxito do plan”, sinalou Pérez Touriño, quen agradeceu o traballo realizado ao longo do último ano para dar a luz o plan presentado esta mañá e salientou que seguirá “persoalmente” a programación incluída no mesmo.

11 eixes de actuación

Pola súa banda, o conselleiro de Economía, José Ramón Fernández Antonio, foi o encargado de debullar o plan de desenvolvemento integral. Así, explicou que este proxecto marca 11 sectores de actuación prioritaria –divididos en sectores de soporte e sectores de futuro) entre os que salientou o eólico, o turístico, o loxístico, o naval e o dos biocombustibles.

Respecto do primeiro, explicou que o plan marca como obxectivo duplicar ata o 2011 o valor engadido bruto deste sector de actividade. Ademais aposta por constituír o clúster do sector eólico, atraer empresas de referencia e apoiar o proceso de internacionalización do sector.

En canto ao turístico, o plan fixa como obxectivo multiplicar por 3,5 o valor engadido bruto que xera na actualidade e duplicar a capacidade hoteleira das tres comarcas. Ademais prevé a creación dunha marca turística para Ferrolterra e o desenvolvemento dun plan turístico e de ordenación do sector.

En relación ao sector loxístico, prevé multiplicar por cinco a actividade económica do mesmo, dinamizar e captar tráficos coas compañías navieiras para aproveitar ao máximo as capacidades do porto exterior.

En canto ao naval, recóllese o obxectivo de establecer o clúster do naval e aposta pola diversificación e tecnificación do sector. Ademais inclúe a creación do Centro Tecnolóxico naval en Ferrol e aposta por asegurar a carga de traballo nas instalacións de Navantia.

No que respecta aos sectores de biocombustibles, o documento aposta pola implantación de proxectos de produción de biocombustibles –como o confirmado de Entabán no porto exterior de Ferrol- e aproveitamento da biomasa.