IGAPE

O Porriño (Pontevedra), 15 de decembro de 2006.- O Instituto Galego de Promoción Económica (Igape) porá en marcha en próximas datas unha liña de apoio aos clústers e agrupacións empresariais dirixida a impulsar as fórmulas de cooperación nos sectores produtivos galegos e fomentar as estratexias de innovación, de desenvolvemento tecnolóxico e de internacionalización nas empresas galegas. A iniciativa, anunciada hoxe polo conselleiro de Economía e Facenda e presidente do Igape, José Ramón Fernández Antonio, persegue potenciar elementos chave para incrementar a produtividade das empresas e a competitividade da economía e a Comunidade no seu conxunto. “É necesaria a selección e concentración de esforzos, así como fomentar a transversalidade das iniciativas que poñan en valor as redes de coñecemento, os intanxibeis e a cooperación empresarial”, explicou o conselleiro.

Nese sentido, a posta en marcha dunha nova liña de apoio as agrupacións empresariais innovadoras (AEI´s), supón un salto cualitativo na implicación da Administración no desenvolvemento dos sectores de interése preferente para a economía galega. Neste momento, engadiu o conselleiro, o Igape xa está a traballar nun programa específico para identificación das agrupacións innovadoras representativas dos sectores de interese estratéxico. Entre os sectores con potencial para o desenvolvemento de iniciativas cooperativas, o conselleiro citou os maduros –como o alimantario, o da moda, a pedra natural ou o naval-; e outros emerxentes ou de alto potencial como o de biotecnoloxía, as enerxías renovables, audiovisual, náutica deportiva e de recreo ou a aeronáutica.

Convenio co Clúster de Automoción

O primeiro exemplo dese novo modelo de relacións entre as iniciativas empresariais e a Administración galega dase, precisamente, co Cluster de Empresas de Automoción de Galicia (Ceaga), recentemente constituida en Fundación, e que asinou hoxe un convenio de colaboración co Igape para o desenvolvemento do Plan Estratéxico de Automoción (PESA) 2007-2011. Mediante este acordo, o Instituto dependente da Consellería de Economía e Facenda colaborará activamente no desenvolvemento do PESA durante os cinco anos do plan nos distintos programas do mesmo. “O convenio asinado hoxe servirá como punta de lanza dunha nova forma de apoiar o tecido empresarial galego”, explicou o conselleiro. Trátase, segundo engadiu, dun “reforzo transversal e selectivo, por áreas de actividade empresarial e mediante factores como a innovacion ou o capital humano”.

O PESA contempla o desenvolvemento coordinado de proxectos en materia de coordinación estratéxica do sector, de coordinación comercial, de imaxe e comunicación, de cadea de subministros, de recursos humanos e de infraestruturas. O convenio asinado contempla unha achega pública de 1,66 millóns de euros en 2007, o que supón o 50% do financiamento para as actuacións previstas na primeira anualidade. Na súa totalidade, o PESA prevé investimentos por valor superior aos 27 millóns de euros.

Fórmula novidosa e transversal

Entre as vantaxes do partenariado público-privado que recolle o convenio figura tamén o seu potencial como proxecto piloto e transversal para iniciativas destas características noutros sectores e territorios. “A vocación de transversalidade deste acordo permitirá que o excelente sector galego de automoción sirva de xerme para que ó redor medre un tecido empresarial excelente, y para que na Comunidade no seu conxunto se asente a vía da excelencia”, explico Fernández Antonio. A fórmula, engadiu, “e novidosa e será a axeitada para favorecer o crecemento, a aparición de novas empresas, o desenvolvemento das cadeas de valor; e tamén para a atracción de investimento”, concluiu.